食自己

eat yourself

 

2006/03/28

七味雞丸番外篇:十蚊網燒實戰

上次講開屋企無烤爐,要用鑊煎七味雞丸。今日去十蚊店,找到一個氣體爐專用燒網,見冰箱仲有少少雞肉,於是試試。燒網第一次用前要乾燒一次,然後洗淨先可以用。

燒時有幾點要留意:
1) 雞肉本身少油,容易黏網,所以開始時不妨在網上抹點油。

2) 燒時要用筷子不斷翻動雞丸,因為一燒得耐,雞肉會黏在網上;筷子也不妨沾水。

3) 因為肉碎跌在網上會上火,加上爐頭設計原因,火力會不均勻,所以燒雞丸時,左手要拿著網,不斷調節火候,避免有些雞丸燒焦,有些又不熟。

4) 燒烤時間約需8-10分鐘。

用來送酒一流!




豉汁排骨

一個人煮食,最怕係乜?我最怕係洗鑊,因為又油又黑,仲要過水,洗完又好多時好似硬係好油咁,洗極都無乜實效.所以呢,一枝公,蒸炒煮炸炆燉焗七樣野最好就主攻蒸一瓣就好了. 蒸 排骨係我做仔年代學既,小學生幫手煮定野等阿媽返來做少樣,就由呢一味開始.其實無咩好學,去肉檔同豬肉佬講要幾多排骨,用來蒸既,佢就知你要咩排骨. 排骨洗淨,"擎"乾水,就落料醃佢,例牌醃料通常即係油糖生粉胡椒鹽,總之隨你喜歡,improvise!蘇絲黃就教要加水搞一搞,我未有機會試.之後再 落D豆豉搞勻佢就得左. 查實,醃好就差不多煮好呢味菜.煮飯時擺埋入電飯煲蒸就可以等食.想有d變下可以加d油炸鬼或者麵筋.上檯前有閒情可以灑d紅椒碎上面.