食自己

eat yourself

 

2006/05/07

薯仔Gratin

台式中文叫「奶油烤洋芋」,是唸書時最喜歡的菜之一:做法簡單,加上我是薯仔狂,無肉無魚明明是一勺齋都食得津津有味。當然薯仔價廉(當造時港紙七蚊有3KG)、芝士也價廉(一個Mozzarela才四蚊港紙、一包Pizza cheese 200G才十蚊),加上有美極出品的調味粉(類似香港你諗你調味包),整完丟入焗爐就OK。

儲心積慮,在十蚊店買來小烤碗一個(橢圓型約15cm長果種),早兩日逛超市再買來其他材料,於是有如下版本:

材料:(一人份量)
大薯仔 一個
金寶忌廉磨菇湯(用忌廉雞湯亦可) 半罐
芝士 (可以cheedar或mozzarela,超市賣一舊切出黎,200G果種,這次我用cheedar) 適量

做法:
1) 薯仔去皮,洗淨,切薄片切薄片。

2) 開半罐湯,加同份量水,把薯仔放入同煮;滾後收細火,再煮約三分鐘。煮時要翻動薯仔,避免黐底;但同時小心不要攪爛薯仔。

3) 收火,把薯仔放入烤碗中。芝士用刨絲器刨碎,灑在薯仔上面。

4) 把薯仔放入焗爐200C火焗20分鐘即成。

芝士話「適量」,何謂適量呢?朋友有一名句:芝士永無嫌多。個人喜好:鋪到不見頂就最好。